వరల్డ్ కప్‌లో టీమిండియా దూసుకుపోతుంది. ఆఫ్ఘనిస్తాన్‌పై ఎనిమిది వికెట్ల తేడాతో గెలవడం ద్వారా వరుసగా రెండో విజయాన్ని నమోదు చేసింది. దీంతో పాయింట్ల పట్టికలో రెండో స్థానానికి చేరుకుంది. మెరుగైన నెట్ రన్‌రేట్‌తో న్యూజిలాండ్ అగ్రస్థానం లో ఉంది. భారత బ్యాటర్లలో కెప్టెన్ రోహిత్ శర్మ 84 బంతుల్లో, 16 ఫోర్లు, ఐదు సిక్సర్ల తో 131 పరుగులు చేసి విధ్వంసకర సెంచరీతో టాప్ స్కోరర్‌గా నిలిచాడు. మ్యాన్ ఆఫ్ ది మ్యాచ్ అవార్డు కూడా హిట్ మ్యాన్‌కే లభించింది. ఈ మ్యాచ్‌లో హిట్మ్యాన్ రోహిత్ శర్మ ఏకంగా 15 రికార్డులను అందుకున్నాడు. ఈ క్రమంలో సచిన్ టెండూల్కర్, క్రిస్ గేల్, సౌరవ్ గంగూలీ, రికీ పాంటింగ్, సనత్ జయసూర్య వంటి దిగ్గజ ఆటగాళ్ల ప్రపంచ రికార్డులను బద్దలు కొట్టి సరికొత్త చరిత్ర సృష్టించాడు.
వరల్డ్ కప్‌లో టీమిండియా వరుసగా రెండో విజయాన్ని నమోదు చేసింది.భారత బ్యాటర్లలో కెప్టెన్ రోహిత్ శర్మ 84 బంతుల్లో, 16 ఫోర్లు, ఐదు సిక్సర్ల తో 131 పరుగులు చేసి విధ్వంసకర సెంచరీతో ఏకంగా 15 రికార్డులను తిరగరాసాడు. వరల్డ్‌కప్‌ చరిత్రలో అత్యధిక శతకాలు బాదిన సచిన్ టెండూల్కర్ రికార్డును హిట్మ్యాన్ రోహిత్ బద్దలుకొట్టాడు.తాను ఏడో సెంచరీ సాధించి ఆరు సెంచరీలు సాధించిన టెండూల్కర్ ను వెనక్కు నెట్టాడు .మెగా ఈవెంట్‌లో వేగంగా 1000 పరుగుల మైలురాయిని చేరిన బ్యాటర్‌గా వార్నర్ 19 ఇన్నింగ్స్ రికార్డును రోహిత్ సమం చేశాడు.తాను 19 ఇన్నింగ్స్‌లలో సాధించి వార్నర్ సరసన చేరాడు.వార్నర్ కూడా ఈ మ్యాచ్ లోనే
ఆ ఘనత సాధించాడు .అంతకుముందు ఈ రికార్డు సచిన్ పేరున ఉండేది .సచిన్ ఇరవై ఇన్నింగ్స్ లలో ఆ ఘనత సాధించాడు .అంతర్జాతీయ క్రికెట్‌లో అత్యధికంగా సిక్స్ లు బాదిన బ్యాటర్‌గా రోహిత్ నిలిచాడు. రోహిత్ 556 సిక్స్ లు బాదగా వెస్టిండీస్‌ ఆటగాడు క్రిస్ గేల్ ను అధిగమించాడు. క్రిస్ గేల్ 553 సిక్స్ లతో తరువాతి స్థానం లో ఉన్నాడు .వన్డే చరిత్రలో అత్యధిక సెంచరీలు బాదిన మూడో బ్యాటర్‌గా రోహిత్ నిలిచాడు. 31 శతకాలు బాదిన రోహిత్ 30 శతకాలు నమోదు చేసిన ఆసీస్‌ గ్రేట్‌ రికీ పాంటింగ్‌ను శర్మ అధిగమించాడు.ప్రపంచక్‌పలో వేగవంతమైన శతకం నమోదు చేసిన భారత బ్యాటర్‌గా రోహిత్ నిలిచాడు. రోహిత్ 63 బంతుల్లో శతకం కొట్టగా అంతకుముందు కపిల్ దేవ్ 72 బంతుల్లో శతకం చేసిన రికార్డును హిట్మ్యాన్ బ్రేక్‌ చేశాడు. ఓవరాల్‌గా ఆరో బ్యాటర్‌గా నిలిచాడు.వరల్డ్ కప్ లో అత్యధిక సిక్స్ లు కొట్టిన బ్యాటర్ గా అవతరించాడు .రోహిత్ శర్మ 28 సిక్స్ లు కొట్టగా అంతకుముందు 27 సిక్సర్ లు కొట్టిన సచిన్ ను అధిగమించాడు
ఈ మ్యాచ్‌లో రోహిత్ శర్మ చేసిన సెంచరీ వన్డేల్లో ఓపెనర్‌గా అతనికి 29వది. దీంతో వన్డేల్లో ఓపెనర్‌గా అత్యధిక సెంచరీలు చేసిన రెండో బ్యాటర్‌గా నిలిచాడు. ఈ క్రమంలో శ్రీలంక మాజీ ఆటగాడు సనత్ జయసూర్యను అధిగమించాడు. జయసూర్య 28 సెంచరీలు చేసాడు 45 సెంచరీలతో సచిన్ టెండూల్కర్ మొదటి స్థానంలో ఉన్నాడు.అంతేకాదు స్వదేశంలో జరిగిన ప్రపంచకప్ టోర్నీలలో సెంచరీ చేసిన మొదటి భారత కెప్టెన్‌గా రోహిత్ శర్మ చరిత్ర సృష్టించాడు.ఈ మ్యాచ్‌లో ఇషాన్ కిషన్‌తో కలిసి రోహిత్ శర్మ తొలి వికెట్‌కు 156 పరుగులు జోడించాడు. వన్డే ప్రపంచకప్ చరిత్రలో మొదటి వికెట్‌కు 150+పరుగుల భాగస్వామ్యం నెలకొల్పడం రోహిత్‌కు ఇది నాలుగో సారి. దీంతో ఈ ఘనత సాధించిన మొదటి భారత ఓపెనర్‌గా చరిత్ర సృష్టించాడు.వన్డే ప్రపంచకప్ చరిత్రలో విజయవంతమైన లక్ష్య చేధనలో సెంచరీ సాధించడం రోహిత్ శర్మకు ఇది 3వ సారి. దీంతో విజయవంతమైన లక్ష్య చేధనలో అత్యధిక సెంచరీలు నమోదు చేసిన బ్యాటర్‌గా హిట్మ్యాన్ చరిత్ర సృష్టించాడు. ఈ మ్యాచ్‌లో రోహిత్ శర్మ పవర్ ప్లేలోనే 76 పరుగులు చేశాడు. దీంతో ప్రపంచకప్ చరిత్రలో పవర్ ప్లేలోనే అత్యధిక పరుగులు చేసిన రెండో బ్యాటర్‌గా నిలిచాడు. ఈ జాబితాలో 77 పరుగులు చేసిన న్యూజిలాండ్ మాజీ ఆటగాడు బ్రెండన్ మెకెల్లమ్ మొదటి స్థానంలో ఉన్నాడు.అత్యధిక సంవత్సరాలు 50 సిక్సులు కొట్టిన భారత ఆటగాడిగా చరిత్ర సృష్టించాడు.2017, 2018, 2019లలో కాకుండా ఈ 2023 లో కూడా 50 సిక్స్ లు కొట్టాడు .
Discussion about this post