నల్లగొండ జిల్లా చింతలపాలెం మండల కేంద్రంలో ఎక్సైజ్‌ అధికారులపై నాటు సారా నిందితులు దాడి చేశారు. చింతలపాలెం ఎస్‌ఐ సైదిరెడ్డి తెలిపిన వివరాల ప్రకారం.. మండలంలోని కొత్తగూడెం గ్రామానికి చెందిన గుగులోతు తులశాపై గతంలో అనేక ఎక్సైజ్‌ కేసులతో సహా, అక్రమ మద్యం కేసు నమోదయ్యిందని అన్నారు. పరారీలో ఉన్న తులసియాను పట్టుకునేందుకు ఎక్సైజ్‌ ఎస్‌ఐ దివ్య సిబ్బందితో తండాకు వెళ్లగా తులశా, అదేతండాకు చెందిన భూక్యా సత్యవతి ఎక్సైజ్‌ అధికారులను తీవ్ర పదజాలంతో దూషించారని చెప్పారు.
సమాచారం అందుకున్న స్థానిక పోలీసులు ఘటనా స్థలానికి చేరుకోవడంతో నిందితులు రాళ్లు, బీరుసీసాలతో సిబ్బందిపై దాడి చేశారు. స్థానిక సీసీ నాగరాజుతో పాటుగా ఎక్సైజ్‌ ఎస్‌ఐ దివ్యకు గాయాలయ్యాయి. రాళ్ల దాడిలో ఎక్సైజ్‌ అధికారుల వాహనం అద్దాలు ధ్వంసమయ్యాయి. ఎక్సైజ్‌ ఎస్‌ఐ దివ్య ఫిర్యాదు మేరకు కేసు నమోదు చేసి గుగులోతు తులశా, భూక్యా సరస్వతిని అదుపులోకి తీసుకున్నట్లు ఎస్‌ఐ చెప్పారు.
Discussion about this post