ഉത്തരകന്നഡയിലെ ഷിരൂരില് മണ്ണിനടിയില്പ്പെട്ട കണ്ണാടിക്കല് സ്വദേശി അര്ജുനെ കണ്ടെത്താനുള്ള തിരച്ചില് ഏഴാം ദിവസവും തുടരുന്നു. ജി.പി.എസ്. സിഗ്നല് പിന്തുടര്ന്ന് മണ്ണിനടയില് നടത്തിയ തിരച്ചിലില് അര്ജുനെ കണ്ടെത്താനാകാതെ വന്നതോടെ ഇനിയുള്ള തിരച്ചില് ഗംഗാവലി പുഴയില് നടത്തുമെന്ന് കര്ണാടക അധികൃതര് ഇന്നലെ അറിയിച്ചിരുന്നു. കര, നാവിക സേനകളും എന്.ഡി.ആര്.എഫും സംയുക്തമായാണ് ഇന്ന് തിരച്ചില് നടത്തുന്നത്. കുത്തൊഴുക്കും പുഴയുടെ വലുപ്പവുമെല്ലാം തിരച്ചിലിന് പ്രതിസന്ധി സൃഷ്ടിച്ചേക്കാമെന്ന ആശങ്കയുമുണ്ട്. പുഴയ്ക്ക് നാല്പത് അടിയോളം ആഴമുണ്ടെന്നാണ് കരുതുന്നത്. ഇത്രയും ആഴത്തില് മണ്കൂന പുഴയിലുണ്ടെന്നാണ് വിലയിരുത്തല്. അതുകൊണ്ടുതന്നെ ലോറി പുഴയില് ഉണ്ടെങ്കില്ത്തന്നെ കണ്ടെത്തല് എത്രത്തോളം സാധ്യമാകുമെന്ന കാര്യത്തിലും ആശങ്ക സൃഷ്ടിക്കുന്നു. കനത്ത മഴയും പ്രതിസന്ധിയാകുന്നുണ്ട്.
എങ്കിലും ഇടിഞ്ഞുവീണ മണ്ണിനടിയില് അര്ജുന്റെ ലോറി ഉണ്ടാകാനുള്ള സാധ്യത അധികൃതര് പൂര്ണമായി തള്ളിക്കളയുന്നില്ല. അതുകൊണ്ടുതന്നെ മണ്ണിനടിയില് 12 മീറ്റര് വരെ ആഴത്തിലുള്ള വസ്തുക്കള് കണ്ടെത്തുന്ന അത്യാധുനിക മെറ്റല്ഡിറ്റക്ടര് ഉപയോഗിച്ച് ഇന്ന് തിരച്ചില് നടത്തും. ഉച്ചയോടെ ആ ഭാഗത്തുള്ള മണ്ണ് പൂര്ണമായി നീക്കാനാകുമെന്നാണ് പ്രതീക്ഷിക്കുന്നത്.
ജൂലായ് 16ന് രാവിലെ കര്ണാടകഗോവ അതിര്ത്തിയിലൂടെ കടന്നുപോകുന്ന പന്വേല്-കന്യാകുമാരി ദേശീയ പാതയിലായിരുന്നു കോഴിക്കോട് കണ്ണാടിക്കല് സ്വദേശി അര്ജുന് (30) അപകടത്തില്പ്പെട്ടത്. മണ്ണിടിച്ചിലില് ദേശീയപാതയിലെ ചായക്കടയുടമയടക്കം 10 പേര് മരിച്ച സ്ഥലത്താണ് ലോറിയുടെ ജി.പി.എസ്. ലൊക്കേഷന് അവസാനമായി കണ്ടെത്തിയത്.
Discussion about this post