കര്ണാടകത്തില് മണ്ണിടിഞ്ഞ് അപകടമുണ്ടായ ഷിരൂരില് മണ്ണിനടിയില് കുടുങ്ങിക്കിടക്കുന്നവരില് കോഴിക്കോട് സ്വദേശി അര്ജുന് ഉണ്ടെന്നുള്ള വിവരം പുറത്തുവന്നു. അര്ജുനടക്കം 15 പേരാണ് കുടുങ്ങിക്കിടക്കുന്നതെന്നാണ് ഇപ്പോള് പുറത്തുവരുന്ന വിവരം. ജി.പി.എസ് പരിശോധനയില് മണ്ണിനടിയില് ട്രക്കും ബെന്സും ഉള്ളതായി കണ്ടെത്തി. എന്നാല് കനത്ത മഴയെത്തുടര്ന്ന് ഇപ്പോള് രക്ഷാപ്രവര്ത്തനം നിര്ത്തിവച്ചെന്നാണ് വിവരം.
അങ്കോളയിലെ ഷിരൂര് ഗ്രാമത്തിലാണ് ചൊവ്വാഴ്ച രാവിലെയോടെ മണ്ണിടിച്ചിലുണ്ടായത്. മണ്ണിടിഞ്ഞ് ദേശീയപാതയിലേക്ക് വീഴുകയായിരുന്നു. സംഭവസ്ഥലത്ത് നിന്നും ഏഴ് മൃതദേഹങ്ങള് കണ്ടെത്തിയിരുന്നു. ലോറി ഡ്രൈവര്മാര് പതിവായി വിശ്രമിച്ചിരുന്ന സ്ഥലമാണിത്. മണ്ണിടിച്ചിലുണ്ടായ പ്രദേശത്ത് ഒരു ചായക്കടയും ഉണ്ടായിരുന്നു. എന്നാല് അപകടം നടന്ന് മൂന്ന് ദിവസമായിട്ടും രക്ഷാപ്രവര്ത്തനം മന്ദഗതിയിലാണ് പുരോഗമിക്കുന്നതെന്നാണ് ആരോപണം.
റോഡിലെ മണ്ണ് മാത്രമാണ് നീക്കുന്നത്. ദേശീയപാതയിലെ മണ്ണ് നീക്കി ഗതാഗതം പുനഃസ്ഥാപിക്കാനുള്ള ശ്രമം മാത്രമാണ് നടത്തുന്നതെന്ന് ജനങ്ങള് ആരോപിച്ചു. മൂന്ന ജെ.സി.ബികള് മാത്രമാണ് സ്ഥലത്ത് രക്ഷാപ്രവര്ത്തനത്തിനായുള്ളത്. പ്രതികൂല കാലാവസ്ഥയെത്തുടര്ന്ന് തിരച്ചില് ഇപ്പോള് നിര്ത്തിവച്ചിരിക്കുകയാണ്. ഗംഗാവതിപ്പുഴ കരരവിഞ്ഞൊഴുകിയതും രക്ഷാപ്രവര്ത്തനത്തിന് തടസമാകുന്നുണ്ട്. തിരച്ചിലിന് നേവിയുടെ സഹായവും തേടിയിട്ടുണ്ട്. വിഷയത്തില് കേരളം ശക്തമായി ഇടപെട്ടിരുന്നു. അടിയന്തര നടപടിക്ക് മുഖ്യമന്ത്രി പിണറായി വിജയന് നിര്ദേശം നല്കിയിരുന്നു.
Discussion about this post