അടുത്ത അധ്യയനവര്ഷം മാറിവരുന്ന ജീവശാസ്ത്ര പാഠപുസ്തകങ്ങളിലൂടെ ഏഴ്, ഒന്പത് ക്ലാസുകളില് ലൈംഗിക വിദ്യാഭ്യാസം പാഠ്യപദ്ധതിയുടെ ഭാഗമാവും. കുട്ടികളുടെ പ്രായം പരിഗണിച്ചുകൊണ്ടാണ് എസ്.സി.ഇ.ആര്.ടി. പാഠഭാഗങ്ങള് തയ്യാറാക്കിയിട്ടുള്ളത്. കൗമാരത്തിലെ ശാരീരിക മാറ്റങ്ങളും മറ്റും പ്രാഥമികമായി പരിചയപ്പെടുത്തുന്ന അധ്യായമാണ് ഏഴാം ക്ലാസിലെ ജീവശാസ്ത്ര പാഠപുസ്തകം രണ്ടാം ഭാഗത്തിലുണ്ടാവുക. ഒന്പതാം ക്ലാസിലെ ജീവശാസ്ത്ര പാഠപുസ്തകത്തിന്റെ രണ്ടാം ഭാഗത്തിലെ ‘പ്രത്യുത്പാദന ആരോഗ്യം’ എന്ന അധ്യായത്തില് വിശദമായി വിഷയം പഠിപ്പിക്കും.
ലൈംഗിക ചൂഷണങ്ങള്ക്ക് എതിരെയും പാഠഭാഗം കൗമാരകാലത്തുണ്ടാകുന്ന ഹോര്മോണ് വ്യതിയാനങ്ങള്, ആര്ത്തവകാല ശുചിത്വം, ഗര്ഭധാരണം എങ്ങനെ, ഭ്രൂണവളര്ച്ച, ഗര്ഭനിരോധന മാര്ഗങ്ങള്, പ്രസവപ്രക്രിയ, ഗര്ഭഛിദ്രം, ഗര്ഭഛിദ്രത്തിന്റെ അപകടസാധ്യതകള് തുടങ്ങിയ വിഷയങ്ങള് പഠിപ്പിക്കും. ലൈംഗികാതിക്രമത്തിനിരയായാല് എന്തുചെയ്യണം, ആരെ സമീപിക്കണം തുടങ്ങിയ അറിവുകളും ദിശ ഹെല്പ് ലൈന് നമ്പറും പാഠഭാഗത്തിലുണ്ട്.
പത്താംക്ലാസ് പഠനത്തിനു ശേഷം സയന്സ് വിദ്യാര്ഥികള്ക്കു മാത്രമാണ് നിലവില് ലൈംഗികതയും പ്രത്യുത്പാദനവും സംബന്ധിച്ച ശാസ്ത്രീയ അറിവുകള് ലഭിക്കുന്നത്. മറ്റ് വിദ്യാര്ഥികള്ക്കു കൂടി ഇവ ലഭ്യമാക്കുകയെന്ന ലക്ഷ്യത്തോടെയാണ് ഒന്പതാം ക്ലാസ് പാഠപുസ്തകത്തില്ത്തന്നെ ഇവ ഉള്പ്പെടുത്തുന്നത്.
ലൈംഗിക വിദ്യാഭ്യാസം പാഠ്യപദ്ധതിയിലുള്പ്പെടുത്താന് വൈകുന്നതില് കഴിഞ്ഞ വര്ഷം മേയില് ഹൈക്കോടതി അതൃപ്തി പ്രകടിപ്പിച്ചിരുന്നു. 15കാരിയുടെ ഏഴുമാസം ഗര്ഭം അലസിപ്പിക്കാന് അനുമതി തേടി മാതാപിതാക്കള് നല്കിയ ഹര്ജിക്ക് തുടര്ച്ചയായിട്ടായിരുന്നു കോടതിയുടെ ഇടപെടല്. ഇതും പുതിയ തീരുമാനത്തിന് കാരണമായിട്ടുണ്ട്.
Discussion about this post