నవంబర్ మొదటి వారంలో ఏపీలో భారీ వర్షాలు? అసలేం జరగబోతోంది?

ప్రస్తుతం దక్షిణ అండమాన్ సముద్ర పరిసరాల్లో అల్పపీడనం కొనసాగుతోంది. రానున్న గంటల్లో ఇది మరింత బలపడి తీవ్ర అల్పపీడనంగా మారే అవకాశం ఉంది. అండమాన్-నికోబార్ దీవుల పరిసరాల్లో కేంద్రీకృతమయ్యే ఈ వ్యవస్థ.. పశ్చిమ-వాయువ్య దిశగా కదులుతుందని అంచనా వేస్తున్నారు.

అక్టోబర్ 30 నాటికి ఆగ్నేయ బంగాళాఖాతం పరిసరాల్లో వాయుగుండంగా మారే అవకాశం ఉందని అధికారులు భావిస్తున్నారు. ఈ వ్యవస్థ కదలికలు, తీవ్రతను బట్టి తదుపరి వాతావరణ పరిస్థితులపై స్పష్టత రానుంది.

కొత్తగా ఏర్పడుతున్న వాతావరణ వ్యవస్థ ఎటువైపు పయనిస్తుందన్నది ఇప్పుడు కీలకంగా మారింది. గతంలో ‘అర్నబ్’ తుఫాను ప్రయాణించిన మార్గంలోనే ఈ వ్యవస్థ కూడా కదిలే అవకాశం ఉందన్న అంచనాలు ఆందోళన కలిగిస్తున్నాయి.

అదే జరిగితే గోదావరి జిల్లాలపై ప్రభావం పడే అవకాశముందని భావిస్తున్నారు. ముఖ్యంగా తీరప్రాంతంలో ఉన్న కోనసీమకు ముప్పు పెరిగే అవకాశం ఉందన్న చర్చ సాగుతోంది. అయితే కొత్త వ్యవస్థ తుది గమనం, తీరం దాటే ప్రాంతం, ప్రభావం ఎంతవరకు ఉంటాయన్నది ఇంకా స్పష్టంగా తేలాల్సి ఉంది. తాజా వాతావరణ బులెటిన్ల ఆధారంగానే పరిస్థితిని అంచనా వేయాల్సి ఉంటుంది.

వాయుగుండం ప్రభావం పెరిగితే కోనసీమలో భారీ నుంచి అత్యంత భారీ వర్షాలు కురిసే అవకాశం ఉందని అంచనా వేస్తున్నారు. వర్షాలకు తోడు బలమైన ఈదురుగాలులు వీచే పరిస్థితులు ఏర్పడితే తీరప్రాంత ప్రజలకు ఇబ్బందులు తప్పకపోవచ్చు. లోతట్టు ప్రాంతాల్లోకి వర్షపు నీరు చేరి జలమయమయ్యే ప్రమాదం ఉంది. రహదారులపై నీరు నిలవడం, రాకపోకలకు అంతరాయం కలగడం వంటి సమస్యలు తలెత్తవచ్చు. ఇప్పటికే వర్షాలు, ఈదురుగాలుల ప్రభావం ఎదుర్కొన్న ప్రాంతాల్లో మరోసారి ఇలాంటి పరిస్థితులు ఏర్పడితే ప్రజలకు ఇబ్బందులు మరింత పెరిగే అవకాశం ఉంది.