బంగాళాఖాతంలో అల్పపీడనం ఏర్పడే అవకాశం
ఆంధ్రప్రదేశ్‌ను వరుసగా తుపాన్లు, భారీ వర్షాలు తీవ్ర అతలాకుతలం చేస్తున్న నేపథ్యంలో త్వరలోనే మరో తుపాను రానుందనే హెచ్చరికలు తీవ్ర ఆందోళన పెంచుతున్నాయి. నవంబర్ రెండో వారం తర్వాత బంగాళాఖాతంలో కొత్తగా అల్పపీడనం ఏర్పడే అవకాశం ఉందంటూ వాతావరణ శాఖ చేసిన అంచనాలు ఇప్పుడు తీవ్ర భయాందోళనకు గురి చేస్తున్నాయి.
దీంతో కోస్తాంధ్రతో పాటు దక్షిణ కోస్తా, రాయలసీమ ప్రాంతాల్లో మరోసారి వర్షాలు కురుస్తాయా? కొత్త తుపాను ఏర్పడుతుందా? అనే ప్రశ్నలు తెరపైకి వచ్చాయి. అయితే ప్రస్తుతం అందుబాటులో ఉన్న అధికారిక సమాచారం ప్రకారం కొత్త తుపాను ముప్పు ఖరారు కాలేదు.
ఆంధ్రప్రదేశ్‌కు వాతావరణ హెచ్చరిక
ఆంధ్రప్రదేశ్ రాష్ట్ర విపత్తు నిర్వహణ సంస్థ (ఏపీఎస్‌డీఎంఏ) నవంబర్ 5వ తేదీన వెల్లడించిన వాతావరణ నమూనాల సమాచారం ప్రకారం.. బంగాళాఖాతంలో ఒక వాతావరణ వ్యవస్థను మోడళ్లు గమనిస్తున్నాయి. అయితే ఇది ప్రస్తుతం మోడల్ అంచనా మాత్రమేనని.. తుపాను, అధికారిక హెచ్చరిక కాదని సంస్థ స్పష్టం చేసింది. అందుబాటులో ఉన్న అంచనాల్లో ఆంధ్రప్రదేశ్‌కు గణనీయమైన తుపాను ముప్పు లేదని పేర్కొంది. ఏపీ తీరాన్ని తుపాను తాకే అవకాశాన్ని కూడా చాలా తక్కువగా చూపించింది.
తెలంగాణలో వర్షాలు కురుస్తాయా?
కొన్ని ప్రాథమిక వాతావరణ అంచనాల్లో నెల్లూరు, తిరుపతి, చిత్తూరు, అన్నమయ్య జిల్లాలతో పాటు ఉత్తర తమిళనాడు తీర ప్రాంతాలపై ఆ తుపాను ధాటికి వర్షాల ప్రభావం ఉండొచ్చనే సూచనలు కనిపిస్తున్నాయి. అయితే ఈ జిల్లాలకు భారీ నుంచి అతి భారీ వర్షాల హెచ్చరికలు జారీ చేసినట్లు ప్రస్తుతం సమాచారం లేదు. వాతావరణ వ్యవస్థ ఏర్పడితే దాని కదలిక, తీవ్రత, సముద్రంపై ప్రయాణించే దిశను బట్టి ప్రభావిత ప్రాంతాలు మారవచ్చు. మరోవైపు.. స్కైమెట్ వెదర్ నవంబర్ 5వ తేదీన విడుదల చేసిన అంచనా ప్రకారం.. మురసు తుపాను అవశేషంగా ఏర్పడిన అల్పపీడనం క్రమంగా బలహీనపడనుంది. నవంబర్ 9వ తేదీ నుంచి 15వ తేదీ వరకు ఆంధ్రప్రదేశ్‌లో వాతావరణం మెరుగుపడే అవకాశం ఉందని ఆ సంస్థ పేర్కొంది.
ఇటీవల అర్నాబ్, మురసు తుపాన్ల ప్రభావంతో ఆంధ్రప్రదేశ్‌లోని పలు జిల్లాలు భారీ వర్షాలు, ఈదురుగాలులను ఎదుర్కొన్నాయి. ముఖ్యంగా తీరప్రాంతాల్లో పంటలు, రహదారులు, ఇతర ఆస్తులకు నష్టం వాటిల్లింది. మురసు తుపాను బలహీనపడి అల్పపీడనంగా మారినప్పటికీ దాని అవశేష ప్రభావంతో కొన్ని ప్రాంతాల్లో వర్షాలు కొనసాగాయి. ఈ నేపథ్యంలో మరో వాతావరణ వ్యవస్థ ఏర్పడుతుందనే అంచనాలు రైతులు, తీరప్రాంత ప్రజల్లో ఆందోళన కలిగిస్తున్నాయి.
కొన్ని వాతావరణ కథనాల్లో కొత్త వ్యవస్థ తుపానుగా మారితే ‘అక్వాన్’ అనే పేరు పెట్టే అవకాశం ఉందని ప్రచారం జరుగుతోంది. అయితే ప్రస్తుతానికి కొత్త తుపాను ఏర్పడినట్లు అధికారిక ప్రకటన లేదు. అందువల్ల ఆ పేరును ఖరారైన తుపాను పేరుగా పేర్కొనడం తొందరపాటే అవుతుందని వాతావరణ నిపుణులు పేర్కొంటున్నారు. నవంబర్, డిసెంబర్ నెలల్లో బంగాళాఖాతంలో తుపాన్లు ఏర్పడే అవకాశాలు సాధారణంగా ఎక్కువగా ఉంటాయి. అయినప్పటికీ ప్రతి అల్పపీడనం తుపానుగా మారుతుందని చెప్పలేమని చెబుతున్నారు.
సముద్ర ఉపరితల ఉష్ణోగ్రతలు, గాలుల దిశ, వాతావరణంలోని ఇతర పరిస్థితులపై దాని తీవ్రత తుపాను ఏర్పాటుపై ఆధారపడి ఉంటుంది. కాబట్టి రాబోయే రోజుల్లో ఐఎండీ విడుదల చేసే బులెటిన్లు, ఏపీ విపత్తు నిర్వహణ సంస్థ సూచనలను ప్రజలు గమనించాలని అధికారులు పేర్కొంటున్నారు. మత్స్యకారులు సముద్రంలోకి వెళ్లే విషయంలో అధికారిక హెచ్చరికలను పాటించాలని.. రైతులు పంటల రక్షణకు ముందస్తు జాగ్రత్తలు తీసుకోవాలని సూచిస్తున్నారు.
