నేటి బంగారం ధరలు – 22, 24 క్యారెట్ల గోల్డ్ రేట్స్ ఇవే!
బంగారం కొనాలనుకునే వారికి ఇప్పుడు కాస్త ఊరట కలిగించే వార్త. గత కొన్ని రోజులుగా పసిడి ధరలు వరుసగా తగ్గుతూ వస్తున్నాయి. అయితే ఈ తగ్గుదల ఒక్కరోజుకే పరిమితం కాలేదు. ఇవాళ కూడా బంగారం ధరలు భారీగా పడిపోయాయి. హైదరాబాద్, విజయవాడ సహా దేశంలోని ప్రధాన నగరాల్లో పసిడి రేట్లు మరింత దిగివచ్చాయి.
Watch Here for Full Story : https://youtu.be/rdkunC-D9CQ
ప్రస్తుతం 24 క్యారెట్ల స్వచ్ఛమైన బంగారం 10 గ్రాముల ధర రూ.1,25,570 వద్ద కొనసాగుతోంది. నిన్నటితో పోలిస్తే ఒక్కరోజులోనే ధర గణనీయంగా తగ్గింది. ఇక ఆభరణాల తయారీకి ఉపయోగించే 22 క్యారెట్ల బంగారం 10 గ్రాముల ధర రూ.1,15,100కు చేరింది. ముఖ్యంగా గత పది రోజుల ధరలను గమనిస్తే బంగారం కొనుగోలుదారులకు పెద్ద ఊరటే కనిపిస్తోంది. ఈ స్వల్ప వ్యవధిలోనే 10 గ్రాములపై దాదాపు రూ.8 వేల నుంచి రూ.15 వేల వరకు ధర తగ్గింది. వెండి ధరలు కూడా ఇదే బాటలో పయనిస్తూ భారీగా దిగివస్తున్నాయి.
అసలు ఇంతలా బంగారం ధరలు ఎందుకు పడిపోతున్నాయనే ప్రశ్న ఇప్పుడు చాలామందిలో ఉంది. దీనికి ప్రధానంగా అంతర్జాతీయ మార్కెట్ పరిణామాలే కారణంగా కనిపిస్తున్నాయి. అమెరికా డాలర్ బలపడటం, ఫెడరల్ రిజర్వ్ వడ్డీ రేట్ల విషయంలో కఠిన నిర్ణయాలు తీసుకోవచ్చనే అంచనాలు ఇన్వెస్టర్ల ఆలోచనలను మార్చేశాయి. దీంతో చాలామంది తమ పెట్టుబడులను బంగారం నుంచి ఇతర మార్గాల వైపు మళ్లిస్తున్నారు. మరోవైపు, గతంలో ధరలు రికార్డు స్థాయికి చేరడంతో బంగారం కొనుగోలు చేసిన కొంతమంది ఇన్వెస్టర్లు ఇప్పుడు లాభాలు తీసుకునేందుకు విక్రయాలు చేస్తున్నారు. అంతర్జాతీయ మార్కెట్లో ఔన్స్ బంగారం ధర తగ్గడం కూడా మన దేశీయ మార్కెట్పై ప్రభావం చూపిస్తోంది.
ఇదిలా ఉంటే, రాబోయే రోజుల్లో బంగారం ధరలు మరింత తగ్గుతాయా? అన్న చర్చ కూడా మొదలైంది. ప్రస్తుత పతనం ఇలాగే కొనసాగితే 22 క్యారెట్ల బంగారం 10 గ్రాముల ధర లక్ష రూపాయల దిగువకు వచ్చే అవకాశం ఉందని కొన్ని మార్కెట్ అంచనాలు చెబుతున్నాయి. అయితే అంతర్జాతీయ పరిణామాలను బట్టి ధరలు మళ్లీ పెరిగే అవకాశాన్ని కూడా కొట్టిపారేయలేం.
అందుకే పెళ్లిళ్లు, శుభకార్యాల కోసం బంగారం కొనాలనుకునేవారు మార్కెట్ పరిస్థితులను గమనించాలని నిపుణులు సూచిస్తున్నారు. ఒకేసారి మొత్తం కొనుగోలు చేయకుండా, ధరలు తగ్గినప్పుడల్లా కొద్దికొద్దిగా కొనుగోలు చేయడం ద్వారా ధరల హెచ్చుతగ్గుల ప్రభావాన్ని కొంతవరకు తగ్గించుకోవచ్చని చెబుతున్నారు.
